O' Gallucciello

Stanotte, dinto 'o core da' nuttata,

nu sbattimiento 'e porte e curre, curre :

s'appiccecava 'o russo cu' 'a mugliera,

arrevutanno tutto 'o vicinato.

'A ggente che curreva a mmano a mmano

diceva : -Neh, che dè? Pecchè 'sti' strille?-

-E' donna Cuncettella c' 'o marito- diceva una.

-No! hanno truvato 'a zoccola 'nto 'o lietto...-

E 'n ce s'accapezzava.

-Venite cca' cumma', sta 'onna Cuncetta,

mo' addimannammo a essa ch'è 'o suggetto-.

Difatto, sotto 'o vascio, 'n miezo 'a ggente,

donna Cuncetta, cu' 'a cammisa 'n cuollo

pareva quanno 'o ffuoco 'ntoppa 'a paglia:

cu' ll'uocchie 'a fòre, 'e braccia smaniava,

parevano 'e palette 'e nu mulino

e tutte 'e mmosse accumpagnava cu' 'a voce :

-Levatammillo 'a tuorno, 'stu galiote!

Sinnò quacche pazzìa cummetto mò!!-

L'aveva cu' 'o marito, Ciccio 'o russo,

ca' dint' 'a casa, cummigliava 'e bbotte

chiunque se faceva attuorno a jsso :

'e figlie, 'a gnora, e pe' fin'anche 'a gatta,

pecchè sfuca' vuleva 'a rraggia 'e pressa.

-Cuntate a me cumma', ca' metto pace-

diceva 'onna Sisina 'a spigaiola,

che steva 'e casa dduie o tre vasce appriesso.

-Che v'aggio 'a di' cumma', vuie che dicite?!..

stu' svergognato nun se fa capace

ca' ll'anne so' ppassate e ca' mò è viecchio;

a vvòte...a vvòte 'o piglia 'a fantasia

e 'nta 'a nuttata sfotte 'o pasticciotto;

senza ritegno, ca' 'nta 'a stessa casa,

ce dòrmeno 'e zetelle e 'e giuvinotte!!-

-Va bbuo' cumma', ca ll'anne so' ppassate...

a cunte fatte, chillo v'è marito...

cercate 'e nnò piglià cchiù tanto 'e pietto :

vol dire, v' 'o facìte zitto zitto!...-

-Vuie pazziate! Quanno zompa 'n cuollo,

ce vo' cchiù 'e n'ora pe' ce 'o fà arrivà!

V' 'o magginate, chillu vessicante,

pe' n'ora 'n cuollo, che ve fà passà?!

A chella età, fa ancora 'o gallucciello,

à perzo 'o scuorno, vuie vedite ccà!!-

S'erano fatte 'e quatte da' matina

e d'acquità, nun se truvava 'a via,

quanno 'nto 'o fatto, mmiezo, jesce 'a figlia

e n'accumudamento prupunette :

-fennimmele 'sti ccose; a cunte fatte

che ce po' ffà, si ancora 'o core 'n pietto,

papà se sente, jamme a ce cuccà!

tanto, pe' tanto, nuie mo' già 'o ssapimmo,

mettimmo 'a capa sotto, e nun sentimmo!!-

Bizzoca Faveza

Cu' 'na veletta nera ammerlettata

ca te cummoglia 'sti capille d'oro,

tutte 'e matine passe pe' 'sta via

cu ll'uocchie 'n terra, e sotto sotto 'o muro,

pe' ghj' 'nta cchiesa e 'a messa a te sentì.

Marì,

te stongo appriesso 'a tanto tiempo

e nu bizzuoco songo addiventato

cu' la speranza che te jesse a voglia,

ma niente, tu si' tosta!

Me vide pure, e finge 'e nun capì,

ne so' ppassate mise, che pòzzo dì?!

Che vengo a ffà 'nta 'a cchiesa

se invece de pregà

tu jastemmà me fai.

'O disperzo

Conto 'e semmane,

'e mise...

è proprio n'agunia, 'na morte lenta

'sta guerra, 'n mmieze 'e pprete do' deserto.

L'aria è 'mprignata 'e pòvere e 'o respiro

te manca 'n pietto;

'nu poco 'e sole...

Ll'acqua 'n ze vede che so' già tre journe;

che sete tengo, mamma mia che sete...

e che delirio 'e freva...!

Se so' asseccate pure 'e ppelle 'n cuollo

parimme già cadavere ambulante.

Niente, niente aaiva dinto 'a 'stu deserto :

ne pane, ne fucile, ne cannune;

'e panne 'n cuollo se so' fatte a piezze

e 'e piede a ssanghe chiòvene...

Nu sole che m'acceca..

e 'a faccia 'n terra

pe' nun fà da bersaglio do' nemico,

e attuorno ll'uocchio àto non vede

che sule prète, prète secche e sole...

che sete tengo, mamma mia che sete...

e che delirio 'e freva...!

A poche passe, comme abbandunate,

'na rocchia 'e croce, una vicina a n'ata

e manco 'o nomme se cunosce 'e lloro :

so' muorte nuoste?

O la stanno ammiscate nemice e no nemice...?

Chi 'o ssape...!

Chi sa dimane, o pure c'oggi stesso

nun vengo a farve io pure cumpagnia...

Tengo vint'anne, ma che vo' di',

io già me sento viecchio...

Chi vuo' che tène 'o ggenio 'e ce penzà?!

Tanto, chi 'a cumannato chesta guerra,

cu' 'a panza chiena, 'a casa sta 'o cupierto

e poco le 'mporta, si pe' tutte 'e fronte,

a ddiece, a cciento, a mille,

mòreno ggente accise...

e 'a famme, e 'a sete...

Mado'!

S'annebbia 'a vista...

facesse notte ampressa...

si no, 'na palla 'n pietto, meglio accussì

e vaco io pure là.

Nu poco d'acqua o 'a morte

venite! ll'una o ll'àta!

Che sete tengo, mamma mia che sete...

e che delirio 'e freva...!

Ma chello ca' io mò penzo, a chi 'o ddico?

Si attuorno a me nun ce sta cchiù nisciuno?!

Ato ca' cielo 'n capo e 'a terra sotto 'e piede

e attuorno muorte,

sulamente muorte...!

M'ànno lasciato sulo, e comme faccio?

Nun se so' accorte ch'ero ancora vivo?

Quant'ore songo stato 'e faccia 'n terra?

M'ànno lasciato comme fosse muorto!

'A coscia me fa male, pure 'a capa...

te ccà, che de' 'stu rrusso

che me scorre pa' coscia, 'n pietto, 'n faccia?

Si, nun se sbaglia, chestu rrusso è ssanghe!!

Dio mio do' cielo...

comme te ne staie??!!